REGJISTRIMI I DIASPORËS ME LISTË SUPLEMENTARE

Reporteri Shuquri Sejdijaj interviston ambasadorin z. Lulzim Peci

Nga dita e parë e muajit prill të këtij viti Kosova nis edhe një ndërmarrje të madhe, një ndërmarrje që Kosovës i ka munguar që nga viti 1981. Pra në Kosovë fillon regjistrimi i popullësisë, i ekonomive familjare dhe i banesave. Ligji për këtë është kritikuar në disa raste, herë për vonesë e herë për nguti të miratimit të ligjit ashtu si dhe për trajtim joadekuat të qytetarve të mërguar në botë. Me ligjin e miratuar për regjistrim mërgata shqiptare trajtohet si popullatë jorezidente, dhe si e këtillë edhe do të regjistrohet.

Zoti Lulzim Peci, ambasador i Republikës së Kosovës në Mbretërinë e Suedisë, e vlerëson si ndërmarrje të jashtzakonshme dhe fundamentale regjistrimin e popullësisë në Kosovë.

- Regjistrimi i  popullësisë në Kosovë me siguri është një prej ngjarjeve apo zhvillimeve më fundamentale që do të ndodhë në Kosovë pasiqë regjistrimi i popullësisë po ndodhë pas 30 viteve. Në esencë asnjë shtet nuk mund të zhvillohet mbi parametra real nëse ai nuk e ka një regjistrim të popullatës. Ndaj me këtë rast dua tu përkujtoj që deri më tani i gjithë planifikimi në Kosovë në masë të madhe është bërë në projektime statistikore dhe jo me gjendjen reale që kemi në vendin tonë. Mendoj që regjistrimi i popullësisë është një ndërmarrje shumë e rëndësishme me të cilin Kosovës si shtet tani do ti mundësohet që të bëj një planifikim më të mirë edhe në aspektin zhvillimor të Kosovës por njëkohësisht do të fitohet edhe një pasqyrë e gjendjes demografike në Kosovë e cila është substanciale për vet politikat e qeverisë dhe mirëqenien e qytetarfve të saj, thot ambasadori Lulzim Peci.

Atëherë si qëndron puna me diasporën shqiptare?

- Diaspora jonë do të përfshihet në regjistrimin e popullësisë por në një formë të veçantë. Regjistrimi i kësaj pjese të qytetarve tanë në botë do të bëhet nga anëtarët e familjeve të tyre nëse këta nuk gjenden në Kosovë në kohën kur bëhet regjistrimi i popullësisë dhe kjo do të bëhet me një formularë të posaçëm, formulari S1, ku jipen të dhënat për personat që gjenden në diasporë, dmth të dhënat e tyre personale, vitin kur kanë dalë dhe arsyet që kanë ndikuar që ata ta lëshojnë vendin. Kështuqë, kur të kryhet ky proces do të arrihet një pasqyrë mjaft e sakt e numrit të qytetarve tanë psh në Suedi, Norvegji, Finlandë, SHBA e vende tjera. Kjo ndërmarrje do të na ndihmojë që për herë të parë Kosova do ta ketë një pasqyrë më reale të diasporës gjë që deri tani të dhënat për te na kanë munguar dhe po e them prap se është punuar me projektime të statistikave.

Me këtë rast ambasadori Lulzim Peci thekson:

- Regjistrimi i popullësisë realisht është fotografim i gjendjes në Kosovë. Një person që jeton jasht Kosovës, megjithëse nuk përfshihet në regjistrimin e banorëve rezident atëherë  për këtë shkak do të regjistrohet si banorë jorezident i Kosovës, porai gjithësesi gëzon të gjitha të drejtat si çdo shtetas tjetër i Kosovës; pra janë pjesë e regjistrit civil të Kosovës nëse regjistrohen, kanë të drejtën e pasaportës, të lejës së njoftimit, dhe siç e thash i gëzojnë të gjitha të drejtat që i gëzojnë qytetarët e Kosovës. Mirëpo një person nuk mund të ketë dy vende të rezidenës, sepse jetohet në një vend dhe për këte arsye ai klasifikohet sipas vendit ku jeton dhe pa humbur të drejtat tjera si qytetarë i Kosovës.

Megjithëkëte është vrejtur një lloj droje tek njerëzit tanë në mërgim.

- Nuk ka arsye për kurrfar droje. Bile unë do ti kisha inkurajuar njerëzit tanë që jetojnë në Suedi që të dhënat e tyre t´ua dërgojnë anëtarve të familjes në vendlindje në mënyrë që familjet e tyre në Kosovë të mund të transmetojnë tek zyrtarët e regjistrimit të dhënat e sakta për ta. Ata do të jenë pjesë e regjistrimit të popullësisë në Kosovë, por siç thash edhe më herët, ata do të cilësohen si banorë jorezident, pra si banorë që nuk banojnë në Kosovë. Do theksuar se regjistrimi i popullësisë në Kosovë bëhet sipas standardeve evropiane dhe Kosova ka arsye të jetë krenare që po bën këtë punë sepse Eurostati ka vlerësuar se janë bërë të gjitha përgatitjet sipas normave ndërkombëtare gjë që në krahasim me vendet tjera të rajonit Kosova ka ecur përpara ndërkohë që disa vende të rajonit ende nuk kanë marrë dritën e gjelbërt.

Atëherë kalojmë në një çështje tjetër. Si ka rrjedhur promovimi i ambasadës së Republikës së Kosovës në Suedi gjatë kohës nga themelimi e deri më sot?

- Mund të themi që me hapjen e ambasadës së Republikës së Kosovës në Stokholm marrëdhënjet e ndërsjella ndërmjet Republikës së Kosovës dhe Mbretërisë së Suedisë u ngritën në nivelin më të lartë, pra në nivel ambasadorësh. Po ashtu me hapjen e ambasadës së vendit tonë në Stokholm u krijuan marrëdhënje shumë të mira me institucionet e Suedisë dhe bashkëpunimi bilateral po thellohet nga dita në ditë. Do theksuar gjithashtu që ambasada jonë po gëzon gjithnjë e më tepër respekt ndër radhët e trupit diplomatik në Stokholm megjithë vështirësitë ekzistuese me disa shtete të cilat nuk janë përkrahëse të pavarësisë së Kosovës. Bile në fillim ka pasur edhe tentativa për bojkotim të punës së Ambasadës. S ot Ambasada e Republikës së Kosovës në Suedi është anëtar i respektuar i trupit diplomatik.

Fokusimi i diplomacisë?

- Puna  diplomatike mvaret nga objektivat e politikës së jashtme  të Kosovës dhe nga prioritetet që përcakton kjo politikë.  Në konferencën e ambasadorëve në fund të marsit në Prishtinë do të diskutojmë për të gjitha çështjet vitale me të cilat do të mirren ambasadat e Kosovës në botë. Pritet të bëhet riformulimi i objektivave të politikës së jashtme dhe agjenda përkatëse operacionale  konform të cilave ne do të punojmë si përfaqësi diplomatike.

Ambasada në Stokholm do të mbulon edhe vende tjera pos Suedisë?

- Presim që së shpejti të përfundojë procedura e akreditimit në Finlandë dhe Norvegji  kurse më vonë edhe në ndonjë vend tjetër të rajonit.

Na thuani ju lutem çfarë janë kontaktet me bashkëatdhetarët në Suedi?

- Kontaktet janë të përditshme  përmes shërbimit konsullor të Ambasadës.  Poashtu që nga fillimi i punës tonë në Suedi kemi vënë kontakte me shoqata e klube dhe individ të dalluar në fushta të ndryshme të veprimtarisë në Suedi. Ndihma ndaj m ërgatës do të rritet me zbatimin e plotë të ligjit për mërgatën që është aprovuar më 2010, dhe në bazë të cilit është formuar edhe Agjensioni për Mërgatën pranë Zyrës së Kryeministrit . Po ashtu në bazë të këtij ligji është paraparë që në vendet ku ka shumë  mërgimtarë të krijohen Qendrat Kulturore të Kosovës për Mërgatën të cilat veç tjerash do të mirren me kultivimin dhe promovimin e kulturës e të arsimit për mërgatën. Me themelimin e këtyre qendrave do të kontribuohet në ruajtjen e identitetit por edhe në intensifikimin e kontakteve të mërgimtarve në fushën e kulturës, por edhe në sfera të tjera me vendin amë.

Jemi në shërbim të qytetarve tanë dhe përpiqemi që në çdo moment t’ju dalim krah në plotësimin e nevojave të tyre në bazë të ligjeve ekzistuese në Kosovë.

Ne jemi të vetëdijshëm që e gjithë ndihma nuk mund tu ofrohet në momentin e tanishëm  sepse korniza ligjore nuk është e plotësuar ende sa i përketë disa çështjeve teknike por, shpresojmë që shërbimi ynë konsulor së shpejti do të ketë edhe mundësinë e dhënjes së lejeve të njoftimit dhe të pasaportave.

Shërbimet konsulore

• Për momentin procesohen kërkesat për pasaporta të Republikës së Kosovës  për persona që posedojnë lejet e njoftimit të Kosovës
• Afrohet shërbim rreth kërkesave për lirim nga shtetësia e Kosovës
• Përmbushen kërkesat rreth akteve të gjendjes civile, pra atyre që u lind një fëmijë në Suedi kanë mundësi që fëmijën ta regjistrojnë tek shërbimi konsulor
• Bëhet regjistrimi i martesave, por edhe i vdekjeve
• Lëshohen dokumente udhëtimi për një drejtim

- Me këtë rast dua të inkurajojë qytetarët dhe shtetasit tanë në Suedi që të regjistrohen në shërbimin tonë konsulor. Ky regjistrim nuk është obligativ por është më se i dëshirueshëm. Ky lloj regjistrimi përfshinë të dhënat personale dhe detajet e kontakteve, si telefoni, adresa fizike dhe e-mailat. Të dhënat e këtilla janë të nevojshme që në rast të ndonjë fatkeqësie natyrore ose diçka të ngjashme, të mund të vemi kontakt të menjëhershëm me qytetarët tanë për të marrë të gjitha masat e duhura për trajtim sipas gjendjes së jashtzakonshme. Ngjarjet e tilla nuk mund ti abstrahojmë, dëshirojmë që kurr të mos ndodhin por ne duhet të jemi të përgatitur edhe për raste të këtilla. Përkujtojmë këtu për pak kohë ngjarjet e ditëve të kaluara në Egjipt dhe angazhimet e Ambasadës së Kosovës në Turqi për tërheqjen e qytetarve të Kosovës nga vendi i krizës. Kjo është bërë edhe në rastin e Jemenit, në Japoni dhe në Libi, me ç’rast Qeveria e Republikës së Kosovës dhe përfaqësitë e saja diplomatike kanë provuar se kanë kapacitet për të i ndihmuar qytetarët tonë në vendet me rrezik të lartë të sigurisë, bile edhe në ato vend e nga të cilat nuk jemi njohur, thot z. Lulzim Peci, Ambasador i Republikës së Kosovës në Mbretërinë e Suedisë.

Nga ceremonia e dorëzimit të letrave kredenciale

Si është hapë ambasada e Kosovës në Suedi?

Mbretëria e Suedisë e ka njohur Kosovën dhe ka lidhë marrëdhënje diplomatike me Kosovën qysh në mars të 2008-ës dhe me këtë akt janë krijuar kushtet që të hapet ambasada e Kosovës në Suedi.

E gjithë kjo tani ka një histori procedurale: më 10 shkurt të vitit 2009 presidenti i Kosovës mori vendim për hapjen e ambasadës së Republikës së Kosovës në Mbretërinë e Suedisë. Pas këtij vendimi, më 17 korrik 2009 është bërë nominimi i ambasadorit nga presidenti kurse pëlqimi apo agremani siç thuhet me fjalorin diplomatik, nga Mbretëria e Suedisë i mbrrinë Kosovës në fillim të shtatorit 2009 kurse më 15 shtator presidenti i Kosovës dekreton ambasadorin e Kosovës në Mbretërinë e Suedisë.

Më pastaj është zgjedhur edhe ekipi politik dhe konsullor dhe për herë të parë si ekip diplomatik arrinë në Suedi më 13 dhjetor 2009. Më 4 shkurt 2010 ambasadori i Republikës së Kosovës dorëzoi letrat kredenciale tek Mbreti i Suedisë, Carl XVI Gustaf dhe me këtë akt Kosova ka ambasadorin e vet fuqiplotë dhe të jashtzakonshëm në Mbretërinë e Suedisë.

Fakte për z. Lulzim Peci: U lind më 6 korrik 1966. I martuar ; Ka një vajzë.  Lexon shumë, sidomos rreth marrëdhënjeve ndërkombëtare, historisë dhe posaçërisht e do matematikën.

Prej gjuhëve të huaja flet anglishten, serbishtën dhe spanjollishten.

Me profesion është inxhinier i elektroteknikës dhe ka magjistruar në Marrëdhënjet Ndërkombëtare pranë Institutit Universitar Ortega y Gasset Në Madrid, Spanjë.

Një kohë ka punuar si ligjërues në Universitetin në Prizren në fushën e politikës së sigurisë politike kombëtare dhe ndërkombëtare.

Njihet si themelues i dy organizatave joqeveritare, Institutin e Kosovës për Kërkime dhe Zhvillim të Politikave (KIPRED) dhe Fondacionin Kosovar për  Shoqërisë Civile (KCSF).

Ka qenë anëtar i disa organizatave profesionale e universitare si dhe ligjërues mysafir në Qendrën e Gjenevës për Politika të Sigurisë.

Ka bërë mbi 30 punime shkencore dhe studime të politikave në fushën e sigurisë, politikës së jashtme dhe qeverisjes të botuara në Kosovë, Austri, Gjermani, Zvicër, Britani të Madhe, Holandë dhe Japoni./ 22 mars 2011,Stokholm/.

Shuquri SEJDIJAJ

Të dhëna të reja për vrasjen e Palmes

Dihet tashmë se një serb ka vrarë ish-ministren e punëve të jashtme të Suedisë, Anna Lindh. Tash dyshohet se edhe vrasësi i Palmes mund të ketë qenë një serb!

Duke ju referuar mediave gjermane, mediat elektronike të Suedisë raportojnë se ka qenë Shërbimi i sigurimit shtetëror të Jugosllavisë UDB-ja ajo që ka urdhëruar vrasjen e ish-kryeministrit të Suedisë Olof Palme. Këtë fakt e ka pohuar ish-shefi i sigurimit jugosllav Vinko Sindiçiq në një hetim të cilin e ka shikuar gazeta gjermane "Focus".

Vrasësi i porostiur, sipas mediave tani është 65 vjeç dhe aktualisht banon dhe punon në Zagreb.

Duke raportuar për vrasjen e bërë para 25 vitesh në qendër të Stokholmit kundër kryeministrit të atëhershëm Olof Palme, gazeta "Focus" ka shikuar pjesërisht hetimet e zhvilluara me oficerin e sigurimit jugosllav Vinko Sindiçiq. Hetimetishin zhvilluar zhvilluar më 2008 nga shqyrtuesit gjerman.

Sipas gazetës, në hetime Sindiq kishte pohuar veç tjerash që sigurimi shtetëror në Beograd kishte dërguar një vrasës në Stokholm. Ndërkohë që agjentët e shërbimit shtetëror të Jugosllavisë kishin përcjellur natë e ditë lëvizjet e Palmes me ç´rast kishin vrejtur dobësi në sigurimin e kryeministrit, sipas gazetës Focus.

Siç dihet Olof Palme, kryeministër i atëhershëm u vra më 28 shkurt 1986 në një nga rrugët e qendrës së Stokholmit.

Arma me të cilën u vra Palme ende nuk është gjetur por ajo ishte kontrabanduar nga SHBA në Suedi.
Gazeta pohon gjithashtu se është gjetur edhe personi i porositur për vrasje dhe se ai tani është 65 vjeç dhe jeton dhe punon për një shërbim të sigurimit privat në Zagreb.

Mirret vesh se të dhënat nga procesi hetimor ndaj Sindiçiqit janë përcjellur deri te policia suedeze dhe sipas shefit suedez të Komisionit Palme, Stig Edqvist, të dhënat po kontrollohen.

Shuquri Sejdijaj

Ujiti lulet Liri!

Nga t´ia nis kësaj here?...E kisha menduar krejt ndryshe urimin e sivjem për festat e fundvitit. Pata shpresuar shumë se ti do të ktheheshe sivjet. Më i rritur, mbase tamam burrë do bëheshe... Po dora më dridhet, edhe lapsi në mes gishtrinjve. Më dridhen buzët, e vrej se po ligshtohem pa ndalë.

Me të thanë që kjo më ngjet sa herë të kujtoj ty më duket e panjerëzishme. Po ku ka nënë që s´kujton bijtë e bijat e saja. Ku ka nënë që në këto festa nuk don ti ketë bijtë dhe bijat e saja në sofrën e shpisë?..

Po këto janë dëshirat e mia Liri, dëshirat e çdo nëne, motre, vëllai...Ndoshta po presim kot, po hajt, edhe sivjet po ta ruaj vendin tënd në sofër...

Dhe kur çastet e fundit do ti lënë vend ditës së re të vitit të ri atëherë edhe unë si gjithnjë këto 11 vitet e fundit do të lutem për ty dhe gjithë të tjerët që s´ua dijmë gjurmët. Ishalla sivjet, bile të vdekur po na i kthejnë!

Heu Liri, kush e kishte menduar se kishe me u gëzua edhe të vdekur me të gjetë e më të qajtë si të vdekur!

Më fal Liri, po sonte nuk do të flas shumë, se janë çue peshë do lugetër kundër Kosovës dhe kundër gjithë atyre që rrokën armët për të mbrojtur lirinë e shpisë së vet. Shtihen si engjuj e paqedashës për t´ja bërë varrin të urtit, i cili  s´pati kah të shtyhet më tej dhe atëherë kur u mbështet për muri si thonë dy duar për një kokë...

Më fal Liri, por urimin s´po e shkruaj as nuk po e nis as kësaj here. Po fik dritat dhe po bëhme një me terrin e këtij funddhjetori tmerrësisht të ftohtë.

Po vrej se po ligshtohem pa ndalë e viti që po vjen s´di a më gjen. Nëqoftëse nuk do të jen tharë kur të kthehesh ujiti lulet Liri!/shs/dhjetor 2010.

ZGJIM ME MEND

Të dielën, më 3 tetor, bëhen 20 vite nga dita kur Gjermania Perëndimore dhe Gjermania Lindore u bashkuan në një vend. Ribashkimi i Gjermanisë është përshkruar dhe vlerësuar si ngjarje pozitive dhe e suksesshme por që është shoqëruar edhe me vështirësi.

Për 40 vite me radhë, të dy vendet jetonin me rregullime të ndryshme shtetërore. Shembja e murit të Berlinit i parapriu ribashkimit gjerman dhe u shndërrua pastaj në ideal për njerëz dhe popuj të ndarë padrejtësisht e me dhunë.

Kështu ishte edhe me shqiptarët: të ndarë padrejtësisht në gjithë Ballkanin! Kjo lloj ndarje është zbutur ca me pavarësimin e Kosovës por bashkimi i shqiptarëve në një shtet të vetëm vazhdon të mbetet temë e idealistëve të cilët ngrejnë zërin guximshëm për një Shqipëri natyrale. Nuk më ka rënë të dëgjoj ndonjë politikan zyrtar as në Shqipëri e as në Kosovë ta ketë ngre këtë çështje kombëtare ashtu siç nuk më ka rënë të lexoj dikund se ndonjë parti politike në të dy kuvendet në Tiranë dhe Prishtinë që ta kenë vënë në programet e tyre partiake edhe çështjen e bashkimit të kombit shqiptar! Ndërkohë që gojët i kanë plot me synime për integrime në UE e të ngjashme!

Para 21 vitesh ishte zor të besohej që muri i Berlinit do të binte. Zor e kishin ta besonin edhe vet ndërtuesit, por ai mur u rrëxua; e rrëxuan njerëzit liridashës, duke gëzuar mbështetje nga institucionet e veta qendrore por edhe nga faktorët relevant ndërkombëtar...dhe me 3 tetor 1990 erdhi dita e madhe e gjermanve: Ribashkimi!
Mbaj mend që shembja e murit të Berlinit i dha fuqi idealeve dhe ëndrrave të shqiptarve për bashkim kombëtar.Këto ëndrra ende vazhdojnë. E nëse ëndrrat shihen vetëm në gjumë atëherë koha është për Zgjim dhe atë zgjim me mend./ 20101001/Shuquri Sejdijaj.

Kosova në zgjedhje të parakohshme? - Ncëk!

Mëngjesi i sotëm nisi me një turbulensë trafiku. Linja e kuqe e metros nga Norsborg-u me të cilën udhëtoj për çdo ditë pune deri në qytet për dy orë të plotë vendnumroi. Si rëndom kabllot e energjisë elektrike të këputura! Ndërkaq turbulensa e sotme ndër pasagjerët në pritje, pjesa dërmuese me prejardhje të huajsh, ndërlidhej me mundësinë një vepre terroriste, mbase të ndikuar edhe nga aterimi i detyrueshëm i një avioni kanadez ditë më parë në aeroportin e Arlandës, afër Stokholmit, si pasojë e një telefonate se një person në bord paska me vete masë eksplozive! Kjo u dëshmua si e pavërtetë dhe avioni më pastaj ka vazhduar në destinacionin e vet për Pakistan, por i ndaluari i dyshuar mbeti në aeroport dhe fillimisht nuk dëshironte asnjë agjension udhëtimi ta merrete me vete...Avionët shkojnë e vijnë ndërkaq gojëkëqinjët kurdisin historira nga më të pamenduarat.

Pas dy orësh vendnumrimi, trafiku i metros në linjën time prap normalizohet.

Në kohë dreke në një nga restorantet e parlamentit të Suedisë takoj Sarah Maliqin, nga organizata joqeveritare e Kosovës,Nisiativa e të rinjve për të drejtat e njeriut, dhe Avni Dervishin, sekretar politik në selinë Partisë Popullore. Domosdoshmërisht bisedojmë rreth gjendjes më të re në Kosovë pas dorëheqjes së presidentit.

Tash shtrohet pyetja, ka apo nuk ka krizë politike në Kosovë? Përgjigjet mund të jenë poashtu të dyanshme: ka krizë dhe s´ka krizë!

Normalisht nuk do të duhej të kishte krizë politike. Por për këtë nuk është investuar më parë. Do të duhej rregulluar me kohë çështja  e dorëheqjes eventuale të cilitdo president.

Por tani kërkohen edhe zgjedhje të parakohshme. Ata që më herët kundërshtonin kërkesat për zgjedhje të parakohshme tani i duan këto, kurse ata që kërkonin zgjedhje të parakohshme, tash nuk i duan!

Kështu jemi ne, s´ka kush që na bie në fije!

Por edhe nëse arrihet pajtueshmëri për zgjedhje të parakohshme, atëherë kur do të duhej të mbaheshin? Sivjet? Ncëk!...

Në mbrëmje përpiqem të marrë ndonjë lajm më të qartë se çka po lëviz në Kosovë pas situatës më të re. Por pa sukses. Prej andej transmetohen kryesisht njoftime për shtyp nga takimet e niveleve dhe të përbërjeve të ndryshme. Faktori ndërkombëtar po shtrëngon dhëmbët prap, në mos daltë se edhe këto zhvillime janë pasojë e planeve të tyre!

Presidenti...

Zërat për dorëheqjen e presidentit të Kosovës, Fatmir Sejdiu, kohëve të fundit dëgjoheshin gjithnjë e më zëshëm. Dje ndodhi ajo që përflitej e përshpëritej. Presidenti i Kosovës dha dorëheqje gjë që media e shpërndau shpejt. Mjetet e informimit në Suedi transmetuan një pjesë të deklaratës së Sejdiut duke e shoqëruar me një koment të shkurtër. Me dorëheqjen e presienetit të Kosovës Fatmir Sejdiu vihen në rrezik bisedimet e planifikuara ndërmjet Serbisë dhe Kosovës.

Po kështu sot u shkrua edhe rreth kërkesës së ish Komitetit Suedez të Helsinkit, tani organizata për Mbrojtjen e të drejtave civile, që Suedia të mos i kthej romët në Kosovë. Reagimi i Entit për Migrim ishte i vakët: nuk mund të ndalen njerëzit këtu vetëm pse mund të jene të kërcnuar ose diskriminuar dhe se gjendja ekonomike në Kosovë vazhdon të jetë ende e rëndë. Sigurisht që gjendja ekonomike, ajo që është, godet të gjithë qytetarët e Kosovës, qofshin ata shqiptarë, turq, romë apo diçka tjetër.

Për nesër është caktuar një seminar që e organizon Organizata për Mbrojtjen e të Drejtave Civile, ish Komiteti suedez i Helsinkit,ku megjithë dëshirën time nuk do të arrijë të marr pjesë në këtë forum për të drejtat e njeriut në Stokholm ku do të flet një aktiviste nga Kosova. Fjala është për Sarah Maliqin nga Nisiativa e të Rinjve për të Drejtat Njerëzore, e cila në fokus të diskutimit do të ketë lirinë e shprehjes në Kosovë, ku sipas një raporti të paraqitur në maj të këtij viti vlerësohej se liria e shprehjes në Kosovë vazhdon të jetë ende e kufizuar dhe e rrezikuar.

Mirë që flitet e diskutohet. Mbase ndonjë mbështetje do të merr Kosova në këtë drejtim për të kaluar pengesat ekzistuese që strukturat e caktuara vejnë ndaj njerëzve që duan ta thonë fjalën e vet lirshëm!

Me këto informacione shkurt po i rikthehem blogut tim.
Jeni të mirëseardhur me komentet tuaja.

URIME KOSOVË

Në mëngjesin e 17 shkurtit të 2008 në lokalet e shoqatës shqiptare në Sätra të Stokholmit fillojnë të mblidhen shqiptarët me banim në kryeqytet dhe rrethinë. Nga ora 10:00 lokalet fillojnë të bëhen edhe më të ngushta se ç´janë në të vërtetë. Disa dhjetëra shqiptarë që erdhën nga Norrtälje dhe Nynäshamni pyesin se ku mund të parkojnë veturat. Muzika shqiptare gjëmon nga veturat. Njeëzit vijnë grupe-grupe, urojnë njëri tjetrin, përqafohen dhe që së largu i thërrasin njëri tjetrit "Bacë, u kry".

Rreth orës 11-të, kolona e veturave gati. E para, vetura e Shaniut, e stolisur me katër flamuj të mëdhenj: me flamurin shqiptar, suedez, amerikan dhe atë të UE. Muzika në kupë të qiellit.

Gati. Po gati jemi.

Kolona niset. Qendra e Stokholmit merr ngjyrën e shqiptarizmit, atmosferën e triumfit në këtë ditë të dielë të 17 shkurtit. Buritë e veturave shkyjnë ajrin. Klithma gëzimi. Disa kanë nxjerrur kokat ose gjysmën e trupit në dritaret e veturave, thërrasin Kosova! Kosova är självständig! Tack Sverige! Tack USA! Tack Europ! Kosova e pavarur, faleminderit Suedi, SHBA, Europë... Flamujt valojnë lart në ajr. Njerëzit të qeshur.

Urime pavarësia!

Rëndom tek sheshi i Sergelit në qendër të Stokholmit suedezët festojnë fitoren e kombëtares së tyre në futboll, ose të një atleti ose atleteje në ndonjë garë të madhe sportive, europiane ose botërore. Por jo, sot festojnë shqiptarët.

Me vite të tëra në këtë shesh, shqiptarët mblidheshin në protesta. Ngritnin zëra për padrejtësitë, për shtypjen dhe terrorin serb në ish-Jugosllavi...Edhe sot e kam të afërt jehonën e mijëra grykëve në këtë shesh: Drenicë jemi me ty, UÇK- UÇK, Kosovë, Demokraci...

Po, Sergel, edhe ty mund të themi: U kry! Sot shqiptarët kanë festë, po lind një shtet i ri në Europë, po lind Kosova e re, Republika Demokratike e Kosovës...

Nga qendra, kolona e veturave vazhdon marshutën e saj të së dielës 17 shkurt 2008. Qe pallati i teatrit mbretëror, Shaniu çan rrugën në krye të kolonës dhe ndalon pranë ambasadës amerikane në Gärdet. Shqiptarët hedhin valle, këndojnë...Faleminderit SHBA.

Marshuta vazhdon rrugës pranë Radios dhe Televizionit të Suedisë për të çarë edhe një herë rrugëve qendrore të Stokholmit dhe prap tek lokalet e shoqatës shqiptare në Sätra ku të gjithë së bashku ndoqën trasnmetimin e drejtpërdrejtë të shpalljes së Pavarësisë.

Fatmir Sejdiu, Jakup Krasniqi dhe Hashim Thaçi duke nënshkruar Deklaratën e Pavrësisë 

Shumë ishte folur, shkruar, debatuar dhe pyetjet ishin më se të shpeshta: kur? Një ditë do të vinte, dhe ajo erdhi: Kosova e pavarur.

Dhe derisa po nxjerr këto përshtypje nga bloku im i shënimeve, shtohet numri i vendeve që po pranojnë Kosovën si shtet të pavarur: SHBA, Britania e Madhe, Franca, Gjermania, Italia, Austria, Turqia, Shqipëria, Finlanda, Norvegjia, Polonia, Belgjika, Australia...lista vazhdon të mbushte nga dita në ditë.

Por ka edhe vende që janë të zemruara, madje tmerrësisht të zemruara si Serbia dhe Rusia dhe të disa "ligshtanve" si Greqia, Rumania, Spanja, Sllovakia e Qiproja që ende mbahen të rezervuara, megjithëse i dërguari i posaçëm i OKB-së Martti Ahtisaari, për statusin e Kosovës kishte konstatuar: " Pavarësia është e vetmja mundësi për një Kosovë stabile dhe ekonomikisht të zhvilluar. Prandaj propozoj që në periudhën e parë pavarësia e Kosovës të jetë e mbikëqyrur dhe e mbështetur nga një prani ndërkombëtare civile dhe ushtarake".

Dhe dihet më, pavarësia ishte e pashmangshme: askush nuk e kontestonte këtë, por vetëm donin ta dini, kur, ku dhe si.

Dhe kjo tani ndodhi. Pavarësia e Kosovës sot është realitet, një realitet që po njihet nga një numër gjithnjë e më i madh i vendeve të botës. Lajmi i mirë erdhi.

Urime Kosovë!
Shuquri Sejdijaj